• Unha investigación enmarcada no informe “Comercio de tecnoloxías ecoloxicamente racionais: perspectivas dos países en desenvolvemento”, pon de relevo a importante contribución destes últimos para o futuro deste comercio, así como a conveniencia de aumentar a súa participación.
• Faise referencia a países en desenvolvemento que pasaron de ser importadores deste tipo de tecnoloxías a exportadores, circunstancia que lles permitiu xerar novas industrias verdes, aumentar os seus ingresos e crear emprego.
• Coas políticas e o esforzo tecnolóxico necesario, o informe suxire que outros países destas características poden lograr resultados similares, aludindo á necesidade de que as medidas a nivel internacional sexan apoiadas por outros no ámbito nacional tales como a creación de capacidades e a asistencia técnica.

Cerceda, a 17  de abril de 2019.- Enténdese por tecnoloxías limpas o subconxunto de bens que contribúen directamente á protección ambiental e á loita contra o cambio climático. Partindo desta premisa, unha investigación enmarcada no informe que leva por título “Comercio de tecnoloxías ecoloxicamente racionais: perspectivas dos países en desenvolvemento”, pon de relevo a importante contribución destes últimos para o futuro deste comercio, así como a conveniencia de aumentar a súa participación.

Neste marco, faise referencia a países en desenvolvemento que pasaron de ser importadores deste tipo de tecnoloxías a exportadores. Isto permitiulles xerar novas industrias verdes, aumentar os seus ingresos e crear emprego. De aí que o informe suxira que, coas políticas e o esforzo tecnolóxico necesario, outros países destas mesmas características poidan lograr resultados similares. Neste sentido, recoméndase que as iniciativas para apoiar o comercio de tecnoloxías limpas a nivel internacional sexan reforzadas por medidas a nivel nacional tales como a creación de capacidades e a asistencia técnica.

Anja von Moltke, de ONU Medio Ambiente, considera que o investimento en comercio, innovación e uso de tecnoloxías limpas pode impulsar o desenvolvemento sostible ao facer fronte ao cambio climático, aumentar a resiliencia e apoiar a consecución dos Obxectivos de Desenvolvemento Sostible (ODS) e o Acordo de París.

Alúdese igualmente á importancia de reducir ou eliminar as barreiras arancelarias e non arancelarias para catalizar unha maior participación dos países no desenvolvemento das cadeas de valor.

O informe foi publicado polo Centro de Medio Ambiente e Comercio de ONU Medio Ambiente, o Centro de Tecnoloxía e Xestión para o Desenvolvemento da Universidade de Oxford e o Departamento de Economía Industrial e Xestión da Tecnoloxía da Universidade Noruega de Ciencia e Tecnoloxía. Así mesmo, foi avalado pola Comisión Europea a través do programa Bens públicos e retos mundiais.

Fonte: ONU Medio Ambiente

Imaxe: Pixabay

Saúdos, Departamento de Comunicación