• Este dato enmárcase na enquisa sobre o clima 2022-2023 do Banco Europeo de Investimentos, que explora o comportamento individual cidadán fronte a medidas para combater o cambio climático

Cerceda, a 11 de setembro de 2023.- O cambio climático continúa a ser o terceiro reto máis importante para o país, despois dos problemas económicos e o emprego. Este dato inclúese na segunda parte da enquisa sobre o clima 2022-2023 do Banco Europeo de Investimentos (BEI), que explora o comportamento individual dos cidadáns e as medidas que están a adoptar para combater o cambio climático.

O 80 % dos enquisados, é dicir, 8 puntos porcentuais por riba da media da UE, din estar convencidos de que o seu propio comportamento pode marcar unha diferenza á hora de facer fronte á emerxencia climática. A maioría dos españois (74 %) móstrase a favor de medidas gobernamentais máis estritas que impoñan un cambio no comportamento da xente para facer fronte ao cambio climático. Tamén unha maioría (59 %) declárase favorable a un sistema de orzamento de carbono que asigne a cada persoa un número fixo de créditos anuais para gastar en artigos cunha pegada de carbono elevada (bens non esenciais, voos, carne, etc). Esta opinión é compartida case na mesma proporción polos franceses (57 %) e por unha porcentaxe maior de portugueses e italianos (máis do 68 % e o 64 % respectivamente). 

Así mesmo, as consideracións climáticas á hora de elixir un empregador van gañando terreo entre as persoas que se incorporan cada ano ao mercado de traballo. O 74 % da poboación española afirma que é importante que o seu futuro empregador dea prioridade á sostibilidade e, para o 21 % dos demandantes de emprego, é mesmo unha prioridade absoluta.

A produción de alimentos xera unha parte importante das emisións de gases de efecto invernadoiro. Para axudar aos cidadáns a tomar decisións máis sostibles á hora de facer a compra, o 84 % manifesta estar a favor de etiquetar todos os produtos alimentarios para identificar a súa pegada climática. Esta porcentaxe é similar á de Francia (83 %), pero 6 puntos porcentuais inferior á de Portugal (90 %).

Ademais, o 66 % dos españois afirma que estaría disposto a pagar algo máis por alimentos producidos localmente e de forma máis sostible (porcentaxe similar á dos portugueses, cun 67 %, pero 6 puntos porcentuais por riba dos franceses, cun 60 %).

Reducir o consumo de carne e produtos lácteos contémplase coma outra forma de limitar as emisións de gases de efecto invernadoiro. Neste punto, os españois están divididos, cun 50 % a favor (7 puntos porcentuais por baixo dos portugueses e franceses).

Fonte: Banco Europeo de Investimentos

Imaxe: Pexels