• O documento inclúe os resultados dunha enquisa realizada a máis de 80 plantas de reciclaxe de vidro dunha vintena de países nas que procesaron máis do 60 % dos envases recollidos en 2022

Cerceda, a 6 de febreiro de 2025.- Close the Glass Loop presentou o informe máis completo ata a data sobre o rendemento da reciclaxe de envases de vidro en Europa.

Logo dunha enquisa realizada a máis de 80 instalacións de reciclaxe de residuos de vidro, activas en 20 países diferentes e que procesaron máis do 60% de todos os envases de vidro dispoñibles para reciclar en 2022, o informe confirma que a cadea de valor de recollida e reciclaxe de vidro está a brindar resultados importantes para a economía circular: o 93% de todos os materiais que entraron en planta recicláronse de maneira efectiva en 2022 e o 85% enviouse para volver a fundir e fabricar novos envases de vidro.

O documento tamén destaca a enorme dependencia da recollida municipal, xa que desta provén o 87% de todos os materiais que entran nas instalacións de reciclaxe de vidro moído, coa particularidade de que os importados representan só o 11% do total de insumos, o que demostra a dimensión local da reciclaxe de vidro.

Desta forma, o estudo serve como un recurso valioso para as partes interesadas que buscan mellorar os procesos de reciclaxe de vidro e toda a cadea de valor.

A través das accións descritas na “Folla de roteiro para optimizar a reciclaxe de circuíto pechado de envases de vidro”, as plantas esfórzanse por manter e mellorar aínda máis o rendemento xeral da reciclaxe de circuíto pechado, á vez que se alcanza o obxectivo da recollida do 90% de envases de vidro para reciclaxe na UE.

 Sobre Close the Glass Loop 

Lanzada en xuño de 2020, é unha asociación industrial que ten por obxecto aumentar a cantidade e a calidade do vidro reciclado mediante o establecemento dun programa de xestión de materiais ao longo da cadea de valor.

Esta plataforma europea reúne a fabricantes e procesadores de vidro, produtores de alimentos e bebidas, sistemas de responsabilidade ampliada do produtor e municipios. Traballa xunto cunha rede de socios nacionais en toda Europa para desenvolver e implementar solucións personalizadas para a recollida de vidro que funcionan no contexto local.

Fonte: Close The Glass Loop

Imaxe: Pixabay