• Estímase que o 20% da produción de alimentos da UE desperdíciase actualmente
• Este desperdicio custa ás empresas e fogares uns 143.000 millóns de euros ao ano e provoca alomenos o 6 % das emisións totais de GEI
• Reducir á metade o desperdicio alimentario para 2030 podería aforrar 4,7 millóns de hectáreas de terra agrícola

Cerceda, a 14 de outubro de 2022.- De acordo cun novo informe da organización ambiental Feedback EU, publicado recentemente, a Unión Europea desperdicia máis alimentos dos que importa, circunstancia que trae consigo un negativo impacto sobre a seguridade alimentaria, xa afectada polo escenario xeopolítico que estamos a vivir. Considérase que o 20% da produción de alimentos da UE desperdíciase actualmente.

En 2021, a UE importou case 138 millóns de toneladas de produtos agrícolas por importe de 150.000 millóns de euros. Ao mesmo tempo, o informe 'No Time to Waste', baseado nas fontes máis actualizadas, considera que Europa desperdicia 153,5 millóns de toneladas de alimentos cada ano, cifra que supón case o dobre das estimacións anteriores debido a unha mellor dispoñibilidade de datos sobre os alimentos desperdiciados nas granxas.

O desperdicio alimentario custa ás empresas e fogares da UE uns 143.000 millóns de euros ao ano e provoca alomenos o 6 % das emisións totais de gases de efecto invernadoiro do continente. Reducir á metade o desperdicio de alimentos para 2030 podería aforrar 4,7 millóns de hectáreas de terra agrícola.

PRESIÓNS PARA ESTABLECER OBXECTIVOS LEGALMENTE VINCULANTES

Á luz destes datos, un movemento internacional de 43 organizacións de 20 países da UE emitiu unha declaración conxunta pedindo a Europa que introduza obxectivos legalmente vinculantes para que os estados membros reduzan o desperdicio de alimentos da granxa á mesa nun 50 %. para 2030, tomando como referencia os informes actuais, e revisar a ampliación dos informes para cubrir todo o desperdicio de alimentos na granxa.

Os sinatarios inclúen ás ONG Feedback EU, a Oficina Ambiental Europea e Zero Waste Europe, as empresas de desperdicio de alimentos Too Good to Go e OLIO, e membros da Plataforma da UE sobre perdas e desperdicio de alimentos, o organismo asesor oficial da UE nesta materia.

A Comisión debe presentar unha proposta de obxectivos de desperdicio de alimentos legalmente vinculantes para os estados membros a finais deste ano, con adopción formal para 2023. As negociacións co Parlamento Europeo e o Consello decidirán entón os obxectivos finais. Se se adopta, será a primeira lexislación deste tipo no mundo.

SOBRE EEB EUROPEAN ENVIRONMENTAL BUREAU

A EEB é a maior rede de organizacións de cidadáns ambientais de Europa. Actualmente consta de 180 organizacións membros en 38 países, incluído un número crecente de redes, e representa a uns 30 millóns de membros e simpatizantes individuais.

Fonte: EEB European Environmental Bureau

Imaxe: Pixabay