- Financiados a través do programa marco Horizonte Europa, os proxectos abordarán temas como alimentación sostible, bioeconomía, recursos naturais, agricultura e medio ambiente, para cumprir os obxectivos do Pacto Verde Europeo
Cerceda, a 6 de febreiro de 2025.- A Unión Europea destina 500 millóns de euros a novos proxectos que impulsarán os obxectivos do Pacto Verde para a transformación sostible da economía e a sociedade.
Os 91 novos proxectos fináncianse a través do programa Horizonte Europa da UE para investigación e innovación, no marco da agrupación industrial 6 «Alimentación, bioeconomía, recursos naturais, agricultura e medio ambiente». A súa pretensión é dar cumprimento aos compromisos establecidos no Pacto Verde Europeo, é dicir, axudar a frear a degradación ambiental, reverter o declive da biodiversidade, xestionar mellor os recursos naturais e, ao mesmo tempo, garantir a seguridade alimentaria e da auga.
Os proxectos están ligados ás seguintes áreas:
- Biodiversidade e servizos ecosistémicos: agárdase que axuden a xestionar as redes de áreas protexidas e a mellorar o estado das especies e os hábitats, con especial atención aos polinizadores. Así mesmo, traballarán na integración da biodiversidade, os servizos ecosistémicos e o capital natural na toma de decisións públicas e empresariais. Axudarán a impulsar cambios transformadores para abordar os desafíos sociais mediante o uso de solucións baseadas na natureza.
- Sistemas alimentarios xustos, saudables e respectuosos co medio ambiente desde a produción primaria ata o consumo: a pretensión é que contribúan a previr e reducir o desperdicio de alimentos, desenvolver novos produtos e procesos alimentarios saudables e sostibles e combater o fraude alimentario
- Sectores da economía circular e a bioeconomía : neste caso, os proxectos deben impulsar a transición cara a unha economía circular a través de solucións innovadoras e prácticas sostibles nas rexións e cidades da UE e en diferentes sectores, incluídos o turismo, o mobiliario e os téxtiles.
- Medio ambiente limpo e cero contaminación: deberán contribuír a eliminar a contaminación causada polas actividades humanas nas augas doces e mariñas, os solos e o aire.
- Terra, océanos e auga para a acción climática: neste caso, os proxectos explorarán os aspectos socioeconómicos e ambientais da agricultura en turbeiras e traballarán para mellorar as prácticas e tecnoloxías de rega na agricultura, desenvolvendo tamén modelos oceánicos para analizar o impacto climático en diferentes rexións.
- Comunidades rurais, costeiras e urbanas resilientes, inclusivas, saudables e ecolóxicas: deben impulsar a participación e empoderar ás comunidades locais do Ártico na toma de decisións ambientais, e analizarán o impacto da pandemia de COVID-19 nas comunidades rurais para comprender mellor os factores conductuais que impulsan as eleccións de estilo de vida das persoas.
- Gobernanza innovadora, observación ambiental e solucións dixitais en apoio do Pacto Verde: aquí, deben desenvolver redes temáticas e de asesoramento da UE sobre silvicultura, biodiversidade, agricultura ecolóxica e sistemas gandeiros sostibles. Analizarán o papel dos medios de comunicación e o márketing no fomento de prácticas de consumo saudables e sostibles.
Fonte e imaxe: Comisión Europea
