• Recentemente, pasaron polo Complexo de Cerceda estudantes do Máster en Ciencias, Tecnoloxías e Xestión Ambiental da UDC, así coma do Máster en Enxeñaría Ambiental da USC
• O interese do alumnado céntrase especialmente en comprobar in situ todos os mecanismos que fan posible que a empresa pública logre transformar residuos en recursos, así como nas medidas adoptadas para que a súa xestión sexa sostible

Cerceda, ao 1 de abril de 2025.- Estudantes do Máster en Ciencias, Tecnoloxías e Xestión Ambiental da Universidade da Coruña (UDC) e do Máster en Enxeñaría Ambiental da Universidade de Santiago (USC), realizaron senllas visitas guiadas ao Complexo Medioambiental de Sogama en Cerceda coa pretensión de comprobar de primeira man a súa operativa e, moi especialmente, os procesos técnicos implantados para a selección de residuos e o seu posterior envío aos centros recicladores, ou ben para a súa valorización enerxética, no caso dos non reciclables. Proximamente farao o Máster en Enerxías Renovables, Cambio Climático e Desenvolvemento Sostible, tamén da USC.

En todo momento, os técnicos de Sogama fixeron especial fincapé nas medidas de protección ambiental e da saúde aplicadas pola empresa, precisando que este tipo de infraestruturas son as máis vixiadas na Unión Europea, pesando sobre as mesmas unha rigorosa lexislación, moito máis esixente que a que rexe para o resto das industrias.

Os visitantes dispoñían dun gran coñecemento previo da actividade de Sogama e o seu interese centrábase especialmente en coñecer in situ todos os mecanismos que fan posible que a empresa pública logre transformar residuos en recursos, así como nas ferramentas empregadas para que a súa xestión sexa sostible. Desta forma, evita e minimiza o uso do vertedoiro, dadas as súas negativas consecuencias para o medio ambiente e a saúde pública.

Ademais de realizar un percorrido guiado a pé polas distintas plantas que conforman o Complexo cercedense, os estudantes, e a modo de aperitivo, puideron experimentar o itinerario virtual, a través do cal, e equipados con lentes inmersivas 360º, tiveron a oportunidade de ver, coa maior precisión posible e dende distintos ángulos, o labor de cada unha das plantas e o papel que estas desempeñan en todo o proceso.

Saúdos, Departamento de Comunicación